HÁBITATS
ROCHOSOS E COVAS
Encostas rochosas silíceas con vexetación casmofítica
(código 8220)
Asomos ou afloramentos de rochas silíceas con vexetación especializada establecidas nas súas fendas. No Carreirón trátase de penedías graníticas algo afastadas da liña litoral, con certa verticalidade, nas que medran couselo (Umbilicus rupestris) e varias especies de fentos (Polypodium sp., Davallia canariensis, Asplenium billotii) como plantas características.
Rochedos silíceos con vexetación pioneira
(código 8230)
Vexetación pioneira que coloniza chans esqueléticos asociados a penedías de natureza silícea, como acontece no Carreirón nas zonas de laxes graníticas e outras superficies rochosas de escasa pendente. Localmente son infrecuentes as especies perennes e máis abundantes os pasteiros anuais ralos, con pequenas gramíneas.
