Outro hábitat considerado prioritario, que se presenta en solos esqueléticos, de moi escaso espesor, areosos e con pouca materia orgánica , xeralmente asociados a pequenas cubetas entre afloramentos rochosos, que resecan no verán. Trátase pois de pasteiros pioneiros pouco densos, de escasa altura, compostos por diferentes especies de plantas anuais, como as uvas de lagarto Sedum arenarium e certas gramíneas; entre estas últimas destaca a presenza de Chaetopogon fasciculatus subsp. prostratus, catalogada en perigo de extinción en Galicia.